A alcaldesa de Guitiriz, a socialista Regina Polín, confirmou este venres que non se presentará á reelección nos comicios locais do 26 de maio, o que xustificou con que leva “xa 16 anos en política”. “Creo que todo ten un límite que hai que renovar, e sobre todo gozar da vida”, engadiu.

Así o expresou nunha rolda de prensa na Deputación de Lugo na que o presidente desta institución, Darío Campos Conde, anunciou “a contratación das obras de construción da residencia de maiores, na Casa da Botica de Guitiriz”, para o que se consignarán 1,2 millóns de euros.

A rexedora non puido reprimir as bágoas ao confirmar que non repetiría no cargo e ao lembrar todo o camiño, coas súas “dificultades”, para sacar o proxecto da residencia desde que en 2009 propúxollo ao anterior presidente provincial, o tamén socialista José Ramón Gómez Besteiro.

Así, Campos Conde presumiu de que o proxecto “aforra, con respecto ao prezo de licitación, 400.000 euros que se destinarán a equipamento”. “Xa contamos cos permisos do Concello, de Fomento e de Patrimonio quedando só o informe favorable do PIA por parte da Xunta. Contamos que nun mes poderiamos empezar as obras”, aventurou.

Ao longo da rolda de prensa repetiuse en varias ocasións que “se busca poñer en valor un edificio emblemático como é a Casa da Botica e ofrecer unha residencia céntrica en pleno centro urbano de Guitiriz”.

PRIORIDADE AOS VECIÑOS DE GUITIRIZ

A residencia contará con 52 prazas, tendo “prioridade ao acceso os veciños de Guitiriz, daquela os veciños da contorna e seguidamente todos os lucenses en xeral”, esbozaba Campos Conde.

O conxunto final da edificación comprenderá tres plantas e disporá de 26 habitacións individuais para uso normal, que poden converterse en habitacións dobres, e unha habitación a maiores para uso de enfermaría por residentes que precisen unha atención sanitaria importante.