O Goberno local aclara que a transferencia de crédito para financiar a primeira fase do Centro Deportivo Municipal de San Fiz non implica a renuncia aos proxectos municipais sinalados pola oposición. A situación administrativa destas actuacións demostra que continúan avanzando e que os cambios na distribución dos recursos municipais non supoñen o seu abandono.
En concreto, catro actuacións que inicialmente se financiaban con fondos propios pasan a contar con financiamento europeo a través do PAI-Norte. Este cambio permite reorganizar os recursos municipais e destinalos a outras prioridades, mantendo o avance dos proxectos previstos.
É o caso do aparcadoiro disuasorio do Ceao, cuxas obras están en execución e teñen como data prevista de remate febreiro de 2027. Tamén da humanización das rúas Río Eo e Otero Pedrayo, coa obra xa adxudicada e o contrato asinado.
Pola súa banda, as melloras no parque de Frigsa están en fase de contratación, mentres que o proxecto de mellora e rehabilitación enerxética das naves municipais de Frigsa xa está entregado e queda pendente a súa licitación.
Deste xeito, todas estas actuacións continúan a súa tramitación administrativa, con avances concretos que permiten desmentir que a transferencia de crédito supoña a renuncia a estes proxectos.
Estes datos evidencian que as actuacións seguen o seu curso e que o que se modifica é a fonte de financiamento dalgúns proxectos, aproveitando os recursos europeos do PAI-Norte para liberar fondos propios municipais e destinalos a outras actuacións.
O Goberno local considera prioritario avanzar tamén na primeira fase do Centro Deportivo Municipal de San Fiz, unha infraestrutura que responde á necesidade de dotar Lugo dun novo equipamento deportivo municipal. A transferencia de crédito permite reorganizar os recursos para impulsar esta actuación sen abandonar os proxectos que continúan a súa tramitación.
O Executivo local insiste en que a situación real das obras e dos expedientes administrativos é a mellor resposta ás acusacións da oposición: as actuacións sinaladas seguen avanzando e os cambios de financiamento responden á reorganización dos recursos municipais e ás prioridades de investimento do Concello.
