Tras os traballos desenvolvidos no Corro dos Mouros entre 2023 e 2025, a cuarta campaña de escavacións na parroquia de Santa María Magdalena de Adai, en Lugo, afonda agora no estudo de dous abrigos arqueolóxicos de especial relevancia. Un deles, coñecido como Pena Travesa, conta cun petroglifo con deseños complexos de cazoletas na parte superior da rocha.
O outro alberga un petroglifo único en Europa, cun gravado que representa o fondo dunha cabana duns 40 metros cadrados e que, segundo explica a directora dos traballos, a profesora da USC e investigadora do CISPAC Pilar Prieto, “permitirá completar o coñecemento dunha paisaxe sagrada”. A investigación complétase coa catalogación de seis mámoas e dous novos petroglifos, que amplían o coñecemento arqueolóxico da zona.
Para finais de setembro está prevista ademais unha prospección xeofísica co obxectivo de tratar de identificar restos de estruturas arqueolóxicas no subsolo e poder organizar así futuras investigacións neste espazo. Os traballos desta cuarta campaña comezaron o pasado 31 de agosto e rematarán o 18 de setembro.
No marco da iniciativa, o 17 de setembro, ás 17.00 horas, realizarase unha visita guiada de acceso libre polos xacementos escavados de Penas do Caldeiro. Esta campaña está financiada polo proxecto ‘RODAS – Xacementos funerario-rituais singulares do Final da Idade do Bronce á Idade de Ferro no Noroeste Ibérico’.
