A publicación hoxe no Diario Oficial de Galicia (DOG) da resolución pola que se declara a Área de Rehabilitación Integral (ARI) da Milagrosa e Feijoo abre unha nova etapa para a mellora e transformación destes dous barrios de Lugo.
A alcaldesa de Lugo, Elena Candia, compartiu esta mañá esta resolución cos veciños da Milagrosa, nun encontro no que tamén participaron o delegado da Xunta en Lugo, o secretario xeral de Vivenda e Urbanismo e representantes do equipo de goberno municipal.
A nova ARI abrangue 4.043 vivendas repartidas en 1.025 edificios e permitirá avanzar na rehabilitación de edificios e vivendas e na mellora dos espazos públicos desta contorna.
As actuacións poderán contar con axudas de ata 54.000 euros por vivenda para intervencións comúns nos edificios, como fachadas, cubertas ou ascensores, e de ata 25.000 euros para actuacións no interior das vivendas, segundo as condicións das correspondentes convocatorias. Ademais, existe a posibilidade de destinar fondos á mellora dos espazos públicos.
Elena Candia destacou que a declaración da ARI supón “un novo impulso para unha zona da cidade con moito futuro” e sinalou que o obxectivo é que esta ferramenta se traduza en máis rehabilitación, mellores espazos públicos e unha mellor calidade de vida para a veciñanza.
“Hoxe damos un paso importante, pero seguimos traballando para que este proxecto se converta en realidade e para que as oportunidades que abre a ARI cheguen aos veciños e veciñas da Milagrosa e Feijoo”, afirmou.
