EFE – Redacción | O garda civil suspendido de emprego polo Tribunal Militar Central por abuso de atribucións pedirá amparo ante o Tribunal Constitucional. A suspensión foi ratificada polo Tribunal Supremo, que considera probada a realización dun atestado no que o axente pretendía “dar apariencia delictiva” a un informe da maxistrada Pilar de Lara. O implicado na causa non descarta levar o caso á máis alta instancia, o Tribunal Europeo de Dereitos Humanos.
En declaracións á axencia Efe, o garda civil explicou que a sanción imposta “foi cumprida de xeito íntegro”, avanzando que presentará un recurso de amparo perante o Constitucional. J.M.B. dixo non compartir a decisión do Supremo, sostendo en todo momento que a actuación “foi a correcta”. “Tan convencido estou, que nas mesmas circunstancias procedería do mesmo modo”.
Considera o garda civil investigado que o recurso queda xustificado porque “é unha sentenza da Sala Militar do Tribunal Supremo, que favorece a impunidade e o abuso de poder”. Os maxistrados desestimaron o recurso contra a suspensión de emprego, considerando que é autor “dun abuso de atribucións que causa grave dano aos cidadáns e á administración”.
Maquinación contra De Lara
Os feitos datan de 2014, J.M.B. tivo acceso a un informe da titular do Xulgado de Instrución Número 1 de Lugo, no que valoraba positivamente a actuación de dous membros do Instituto Armado que estaban “baixo as súas ordes” na investigación que daquela levaba a cabo. O garda civil emitiu un atestado en relación co escrito, engandindo que “descoñece se trala elaboración do informe pode existir un beneficio económico” para De Lara ou os axentes mencionados.
Relata o alto tribunal que “querendo que a actuación parecese da Garda Civil de Lugo, abusou das atribucións do cargo, pois en realidade a finalidade non era un asunto de servizo, senón un asunto puramente particular”. En consecuencia, a “conduta abusiva” do recorrente causou “un grave dano á maxistrada”, porque tivo “repercusión tanto na prensa como nas redes sociais”.
O garda civil, que recoñeceu abertamente unha “manifesta enemistade” coa xuíza, agarda sentenza polo xuízo celebrado no Xulgado do Penal de Lugo a mediados de xaneiro, tamén por outro episodio que atinxe De Lara. O Ministerio Público pide dous anos de cadea para o suposto autor de insultos graves e ameazas contra a maxistrada nun foro da benemérita.
