A Consellería de Cultura e Turismo consolidará en futuras actuacións o torreón, a escaleira e o alxibe descubertos no Castro de Viladonga, no termo municipal de Castro de Rei. O departamento autonómico segue así o criterio dos responsables da excavación e a dirección do Museo, conscientes de que estes achádegos obrigan a seguir investigando para reinterpretar a verdadeira dimensión do xacemento.
O depósito de auga e a sofistificación do sistema defensivo son probas da importancia de Viladonga antes da presenza de Roma. Os achados son produto da casualidade, dos derrubamentos acontecidos durante a última campaña de reescavación e perfilado. Estes traballos contaban cun investimento de 200.000 euros; aliás, o delegado territorial José Manuel Balseiro confirmou que haberá que “escavar alén do previsto, e condicionará as intervencións dos vindeiros meses”.
As actuacións no asentamento castrexo afectaron a 1.250 metros cadrados no sector nordeste do Castro de Viladonga, dos cales 100 foron de nova escavación, e o resto actuacións sobre estruturas arqueolóxicas exploradas nos anos setenta e oitenta, para garantir a súa conservación. Ademais, os traballos permiten un percorrido máis accesible para os visitantes e apreciar con claridade a muralla e o foso.
Así, seguirán novas intervencións en liña coa campaña arqueolóxica vixente, pechando a secuencia iniciada en 2016, cando foron consignados outros 200.000 euros para asentar o conxunto e corrixir as eivas detectadas no estudo de diagnose.
