A alcaldesa de Lugo, Elena Candia, celebrou unha reunión coa Asociación de Veciños Parque Rosalía de Castro-Recatelo dentro da rolda de encontros que o Goberno municipal vén mantendo cos distintos colectivos veciñais para coñecer as necesidades de cada barrio e compartir os proxectos que contribuirán á súa transformación.
Durante o encontro, a alcaldesa presentou aos representantes veciñais o proxecto básico e de execución da futura residencia para persoas maiores que a empresa Ballesol S.A. promoverá entre as rúas Cidade de Viveiro e Isaac Díaz Pardo.
Esta iniciativa privada suporá un investimento de 10,9 millóns de euros e permitirá crear unha residencia con 115 prazas, ampliando a oferta de atención ás persoas maiores, xerando emprego e contribuíndo á dinamización desta contorna da cidade. O proxecto contempla ademais dous sotos destinados a aparcadoiro, un primeiro con 25 prazas e un segundo con 52 prazas.
Durante a reunión tamén se informou á entidade veciñal dos avances da Mesa de Seguridade e das actuacións previstas para mellorar a convivencia en distintos puntos do barrio, especialmente na contorna da rúa Vilalba, así como das medidas que se impulsarán para reforzar a seguridade e a calidade de vida da veciñanza.
Ademais, Concello e asociación abordaron outras actuacións prioritarias para Recatelo:
- Recuperar a caseta do gardés do Parque Rosalía de Castro para destinala a local social da Asociación de Veciños.
- Reparar o pavimento deteriorado das zonas peonís para mellorar a seguridade dos peóns.
- Reforzar a limpeza do barrio, especialmente a eliminación de grafitis na rúa Recatelo.
- Continuar impulsando a declaración do Parque Rosalía de Castro como Ben de Interese Cultural (BIC).
- Intensificar o control dos vehículos que utilizan a zona peonil como atallo.
- Apoio ás festas do barrio que se celebrarán no mes de setembro
- Solución das augas fecais do calexón que une rúa Santiago con Cidade de Viveiro
