O Goberno local levará este mes á Xunta de Goberno Local a aprobación da solicitude para a declaración da Área de Rehabilitación Integral (ARI) da Milagrosa e Barrio Feijoo, un paso imprescindible para que os veciños poidan acceder ás novas liñas de axuda previstas no Plan de Vivenda 2026-2030 do goberno central.
O documento técnico necesario para delimitar o ámbito de actuación xa está elaborado e se vén de iniciar hoxe a tramitación municipal para a súa posterior remisión á Xunta de Galicia.
A alcaldesa de Lugo, Elena Candia, destacou que esta actuación permitirá desbloquear unha iniciativa que durante anos non chegou a materializarse, por defectos de forma ou por falta de axilidade por parte do anterior goberno.
“Estamos a falar dunha oportunidade moi importante para os veciños da Milagrosa e de Barrio Feijoo. Queremos aproveitar unha convocatoria máis ambiciosa e máis flexible para que o maior número posible de comunidades e propietarios poidan beneficiarse destas axudas”, sinalou.
O novo programa incorpora melloras significativas respecto ás convocatorias anteriores, tanto pola contía das subvencións como polo tipo de actuacións que poden financiarse. Ademais das intervencións de eficiencia enerxética, poderanse executar obras destinadas á instalación de ascensores, mellora da accesibilidade, renovación de cubertas, entre outras actuacións.
As axudas previstas oscilan entre os 34.000 e os 50.500 euros por vivenda, podendo alcanzar incluso o 100% do custo das actuacións nos casos de especial vulnerabilidade. Trátase dun incremento moi significativo respecto ás anteriores convocatorias, que contemplaban importes máximos notablemente inferiores.
Na fase previa de preparación desta iniciativa, preto de 90 edificios trasladaron xa o seu interese en participar no programa, o que evidencia a demanda existente e o potencial transformador desta actuación para ambos barrios.
