A alcaldesa de Lugo, Elena Candia, e o concelleiro de Mobilidade e Infraestruturas, Antonio Ameijide, comprobaron hoxe o inicio das obras de reposición do pavimento na rúa San Marcos, nun tramo peonil que presentaba un importante deterioro.
A actuación consiste na reposición do firme, trátase dunha zona pola que apenas a van circular vehículos, pero que sufriu danos tras soportar durante meses desvíos de tráfico derivados das obras vinculadas á Zona de Baixas Emisións.
Durante a visita, a alcaldesa explicou que o Goberno local está estudando solucións técnicas máis resistentes para aplicar nas zonas do casco histórico nas que haberá máis paso de vehículos e accesos de carga e descarga co obxectivo de aplicar alternativas máis duradeiras, seguras e adaptadas ao uso diario destes espazos.
Candia lembrou o compromiso do Executivo municipal de avanzar en melloras que permitan reforzar a durabilidade dos pavimentos da ZBE e evitar os problemas de deterioro rexistrados nos últimos anos en distintos puntos da cidade.
No marco do funcionamento ordinario dos servizos municipais, hoxe formalizouse a proposta de adxudicación da obra de reforzo de firmes na glorieta da Avenida Benigno Rivera coa Avenida Infanta Elena. A actuación foi adxudicada á empresa CANARGA S.L. por un importe total de 123.450 euros, IVE incluído.
Asemesmo, asinouse a proposta de adxudicación do servizo de vixilancia e seguridade do Arde Lucus 2026 á empresa SEYVI SEGURIDAD, por un importe total de 44.452,98 euros, IVE incluído.
