A sección segunda da Audiencia Provincial de Lugo xulgará este martes, 21 de abril, a dous homes acusados de protagonizar unha pelexa con ferramentas agrícolas que se saldou con lesións de distinta gravidade, entre elas a perda de visión dun ollo por parte dun dos implicados. A Fiscalía solicita para un deles catro anos de cárcere e para o outro dous anos.
Segundo o escrito de acusación, os feitos ocorreron o 5 de febreiro de 2022, cando un dos procesados se achegou ao outro, co que mantiña desavinzas previas, portando unha pa. Tras unha discusión, o primeiro supostamente ergueu a ferramenta, ante o que o outro respondeu golpeándolle na cabeza cunha aixada.
Como consecuencia do enfrontamento, o primeiro sufriu lesións de extrema gravidade, entre elas fracturas faciais e a perda de visión do ollo esquerdo, ademais de diversas secuelas permanentes. Pola súa banda, o segundo implicado resultou tamén lesionado, aínda que de menor consideración. O Ministerio Fiscal considera que os feitos son constitutivos dun delito de lesións agravadas, no caso do acusado que provocou a perda de visión, e dun delito de lesións con instrumento perigoso para o outro implicado.
Así mesmo, o escrito aprecia no primeiro a concorrencia dunha atenuante de lexítima defensa incompleta, ao entender que actuou para repeler unha agresión previa. Ademais das penas de prisión, a Fiscalía solicita indemnizacións cruzadas entre os acusados, que superan os 54.000 euros no caso do home que sufriu as lesións máis graves, e de 7.900 euros para o outro, así como o aboamento dos gastos sanitarios ao servizo público de saúde.
