A voceira do PP de Pol, Nicole Grueira, subliña que “o goberno de Lino Rodríguez é un goberno gastado e esgotado” como quedou demostrado no Pleno ordinario celebrado este mércores baixo a “habitual crispación” polas formas do alcalde que chegou a ameazar á popular dicindo: “vas sufrir”.
Máis alá das formas dun alcalde que “non representa as formas dos veciños e veciñas de Pol”, a sesión plenaria tamén serviu para abordar outros asuntos como a xestión económica do rexedor socialista que “levou o Concello á ruína”. Precisamente a débeda de 5M€ impide a prestación de servizos aos veciños e veciñas: “o Concello non ten cartos, as pistas están en mal estado e o Punto de Atención á Infancia (PAI), de competencia municipal, atópase en malas condicións”. Neste sentido, Grueira lembra que “o alcalde pretende que o que fai mal ou directamente non fai, veña a Xunta a solucionalo. Isto é unha irresponsabilidade absoluta”, engade.
A popular tamén puxo de manifesto a “obsesión do alcalde co fútbol” porque “só inviste naquilo que ten ver co fútbol”. Por exemplo, a compra dun televisor para o campo de fútbol ou dos chándales para o primeiro equipo, “mentres que os nenos e nenas teñen que pagar 300 euros en equipamento deportivo”.
Nicole Grueira lembrou tamén “a falta de cortesía” do alcalde que se negou a modificar a data de celebración deste Pleno ordinario tras unha solicitude formal da portavoz e deputada autonómica por convocalo posteriormente -un día despois- á convocatoria do Debate do Estado da Autonomía (DEA) que se celebra na mesma xornada no Parlamento de Galicia, onde tamén exerce como representante dos veciños e veciñas.
Grueira condena a “intencionalidade” do rexedor coa que “pretendía impedir o exercicio das miñas funcións como representante pública tanto no ámbito autonómico como municipal” e “vulnerar o meu dereito fundamental á participación política recoñecido no artigo 23.1 da Constitución Española”.
Pero, “a pesar dos impedimentos do alcalde socialista, o meu compromiso con Pol é firme e non evitou a nosa participación na sesión plenaria do Concello”, manifesta a popular.
