O conselleiro de Sanidade, Antonio Gómez Caamaño, reivindicou o servizo de Urxencias do Hospital Universitario Lucus Augusti (HULA) que, tal e como expuxo no pleno, conta con “os menores tempos de resposta e é un dos mellor valorados do Sergas“, entre críticas da deputada Lara Méndez (PSdeG), que resumiu as políticas do departamento autonómico en “tapar e ocultar”.
En resposta a unha pregunta oral da parlamentaria socialista, o titular de Sanidade negou as acusacións e defendeu que nos últimos anos “incrementouse a dotación de persoal” neste servizo do centro lucense. Así mesmo, despois de que Méndez expuxese as demandas de persoal de urxencias como os celadores, Gómez Caamaño asegurou que foron atendidas pola xerencia, que se reuniron con eles e que “tivo en consideración parte das súas achegas”.
CENTRO DE SAÚDE DE CARRAL
Doutra banda, o conselleiro, a unha pregunta da socialista Silvia Longueira sobre as instalacións do centro de saúde de Carral (A Coruña), avanzou que técnicos do departamento autonómico acudiron este mesmo mércores até o lugar e, tras analizar a situación, tomarán unha decisión que podería “incluír a planificación de construción dun novo centro se a situación o require”.
