Un mozo de Lugo enfróntase a unha condena de tres anos de cárcere acusado de reter a unha moza no baño dun establecemento hostaleiro da zona da Piringalla, na cidade de Lugo, e realizarlle tocamentos sen o seu consentimento. O xuízo quedou visto para sentenza tras a celebración da vista oral no Xulgado do Penal número 2 de Lugo na que o acusado negou os feitos.
Os feitos polos que se xulgou este mércores a este mozo remóntanse á noite do 27 de outubro de 2025. Acusado e denunciante coincidiron no local e, tras manter unha conversación, el seguiuna até o baño de cabaleiros. Unha vez alí, sempre segundo a versión da Fiscalía, acurralouna, tocándolle o peito por baixo da roupa e bicándoa no pescozo a pesar da negativa expresa da nova, que lle pedía que se detivese. Finalmente, ela logrou zafarse e saír do aseo.
Durante o xuízo, a denunciante ratificou o seu relato e explicou que coñecía ao acusado de vista. Asegurou que, despois dun primeiro achegamento no que el xa tentou bicala, regresou ao interior do bar cunha amiga e máis tarde volveu saír. Foi nese momento cando, segundo o seu testemuño, o mozo agarrouna do brazo, introduciuna no baño e agrediuna. Indicou que conseguiu marcharse tras insistirlle en que a deixase en paz.
O procesado, pola súa banda, negou os feitos e sostivo que as mostras de afecto foron consentidas. Declarou que foi ela quen se aproximou a el nun primeiro momento e que ambos se bicaron voluntariamente. Tamén rexeitou forzala a entrar no baño ou impedirlle saír nalgún momento.
As declaracións das amigas da denunciante e de traballadores do local ofreceron versións dispares sobre o sucedido antes e despois do suposto incidente. Mentres algunhas testemuñas apuntaron a que a mozo se mostrou alterada tras o ocorrido, outras persoas presentes no establecemento sinalaron que non presenciaron ningunha situación de auxilio nin petición de axuda.
Ademais da pena de prisión, a Fiscalía solicita cinco anos de liberdade vixiada e unha indemnización de 3.000 euros para a presunta vítima polos danos morais. A defensa reclama a absolución ao considerar que non existen probas suficientes que apoien a acusación.
