Os gandeiros de Agromuralla e Gandeiros Galegos da Suprema, concentrados na cidade de Lugo desde o luns 12 de xaneiro para mostrar a súa desconformidade coa firma do tratado de libre comercio con Mercosur, volveron tomar as rúas un día máis para facer ver a súa protesta, apoiados por políticos do BNG, entre eles o deputado Néstor Rego. Varias decenas de persoas uníronse á manifestación que se celebrou desde a sede da Xunta, onde se concentran todos os días, ata a Subdelegación de Goberno, encabezada por un exemplar de boi de Raza Loura Galega e acompañados por pancartas e cencerros. Pechaba a manifestación a pé un nutrido grupo de tractores, que percorreron desde as 11.00 horas a Rolda da Muralla volvendo sementar un caos de tráfico polos arredores.
A marcha abriuse coa pancarta que centraliza as protestas contra o acordo de Mercosur, culpando de “vendelos” aos eurodeputados socialistas e populares. A camiñada estivo precedida por unha arenga na que se animaba a gandeiros e tamén a consumidores a secundar a concentración e a non “renderse” ante a falta de resposta ás súas reivindicacións. Tamén se gardou un minuto de silencio polas vítimas do accidente ferroviario en Andalucía.
FALTA DE RESPOSTA ÁS REIVINDICACIÓNS
Un intre antes, o presidente de Gandeiros Galegos da Suprema, Santiago Rego, anunciou que a concentración de tractores de forma continuada nestas dúas semanas non tivo o efecto desexado, xa que seguen sen contestación nas instancias nas que reclamaron unha entrevista, e citou especialmente ao delegado do Goberno, Pedro Blanco, e os eurodeputados de todos os partidos. “Non entendemos por que se nos vende e por que ninguén nos dá explicacións, pero nós seguiremos defendendo o que consideramos beneficioso para todos, a non sinatura deste tratado. Ese silencio leva á complicidade e é o que nos doe”, asegurou.
O presidente do colectivo destacou que este martes e mércores manteranse as concentracións, pero que logo se reunirán para ver a posible continuidade da tractorada ou buscar outras accións de protesta diferentes e puntuais. “Hai que entender que son moitos días, a xente ten que traballar nas súas explotacións e hai que ver outras opcións de protesta que non impliquen estar de forma continuada aquí”, matizou Rego. Polo momento esta tarde está prevista a mobilización dos tractores de novo polas rúas da cidade e a habitual reunión ás 22.00 horas, sendo tamén un punto informativo para os consumidores das consecuencias que terá a firma deste tratado.
RESPALDO DE NÉSTOR REGO ÁS MOBILIZACIÓNS
O deputado do BNG no Congreso, Néstor Rego, desprazouse a Lugo para trasladar o apoio da organización nacionalista ás gandeiras e agricultores, contra un acordo comercial que considera “profundamente lesivo para o sector primario e para o conxunto da economía produtiva do país”. O deputado nacionalista cualificou o acordo como “un novo golpe ao campo”, que se suma ao incremento dos custos, os recortes previstos nos fondos da PAC para destinalos a investimento militar e a falta de protección real ás pequenas e medianas explotacións.
Rego advertiu de que o acordo UE-Mercosur permitirá a entrada masiva de produtos agrarios e gandeiros procedentes de América do Sur, elaborados en condicións que non cumpren os estándares ambientais, sanitarios nin laborais que se esixen aos produtores galegos. “É unha competencia desleal en toda regra”, denunciou. O dirixente do BNG sinalou directamente a responsabilidade compartida de PSOE e PP no apoio e impulso do acordo e considerou “especialmente grave” o papel do Partido Popular, ao que acusou de actuar con “absoluto cinismo” por ter alentado a firma do tratado durante anos.
DEFENSA DA SOBERANÍA ALIMENTARIA
Así mesmo, criticou que o PSOE “manteña unha posición sumisa ás lóxicas dos grandes intereses económicos e xeopolíticos, sacrificando unha vez máis o campo e utilizándoo como moeda de cambio”. Rego subliñou que o acordo avanza en sentido contrario aos obxectivos de sustentabilidade ou de loita contra o cambio climático ao fomentar o monocultivo intensivo e o transporte intercontinental de alimentos fronte á produción de proximidade.
Por último, reiterou o compromiso do BNG de seguir combatendo o acordo UE-Mercosur en todas as institucións e de esixir que calquera tratado comercial respecte aos sectores produtivos. “É necesario favorecer o consumo de produtos locais, garantir prezos xustos e asegurar que quen produce aquí poida vivir dignamente do seu traballo”, sinalou, concluíndo que a defensa do campo “non é negociable”.
MOCIÓN PROVINCIAL PARA PROTEXER AO SECTOR
A presidenta da Deputación de Lugo, Carmela López, reuniuse con Unións Agrarias e Fademur para analizar o impacto do pacto UE-Mercosur e perfilar unha moción que se debaterá no pleno do 27 de xaneiro. López advertiu de que a aplicación do tratado debe abordarse con “firmeza política” para protexer á provincia, onde o sector primario xera máis do 30 % do emprego. No encontro, no que tamén participaron os deputados Pilar García Porto e Pablo Rivera Capón, subliñouse a dependencia de Lugo do sector gandeiro, xa que concentra o 48 % do censo de bovino de Galicia.
A iniciativa socialista instará á Xunta e ao Estado a reforzar os controis fronteirizos, activar as cláusulas de salvagarda e promover o valor da carne galega. Carmela López lembrou que Lugo produce case o 50 % do leite de Galicia, polo que calquera apertura comercial debe ir acompañada de garantías reais que aseguren a supervivencia das explotacións e a autosuficiencia alimentaria.
