A Audiencia Provincial de Lugo levou a xuízo este martes a un home de orixe romanesa acusado de secuestrar, xunto ao seu fillo e a súa nora, a unha moza de Vilalba coa intención de obrigala a contraer matrimonio, delito polo que lle piden cinco anos de prisión e a prohibición de achegarse á vítima por un período de seis anos. O xuízo contra o fillo e a súa nora celebrouse no mes de marzo do ano pasado e no mesmo non compareceu este acusado debido a que estaba en paradoiro descoñecido e declarado en rebeldía.
Nesa primeira sesión a vítima, unha moza que de 17 anos que no momento dos feitos tiña 14, non identificou os acusados como autores, o que levou á absolución de ambos. Nesta ocasión, o procedemento desenvolveuse da mesma forma. En primeiro lugar, foi chamado ao estrado o acusado, que, acolléndose aos seus dereitos, negouse a contestar a ningunha pregunta. A vítima, que nesta ocasión declarou tras biombo sen a compañía da súa nai, coma se fixera no anterior procedemento, tamén negou recoñecer ao acusado como presunto autor dos feitos e tampouco coincidiu na descrición da furgoneta co devandito na instrución do caso.
Os feitos remóntanse a setembro de 2023, durante a celebración das festas patronais en Vilalba. Segundo se recolle na acusación, a moza camiñaba pola tarde xunto ao seu irmán, en dirección á súa casa, cando foi interceptada por unha furgoneta da que saíu unha muller, que a meteu á forza no vehículo. Poucos metros máis adiante, a moza logrou saír do mesmo polos seus propios medios e fuxiu á súa casa, moi próxima ao lugar, onde estaba o seu pai. Estes denunciaron o secuestro culpando directamente á familia dos acusados, residentes en Rábade, cos que tiñan varias disputas.
Posteriormente, púxose en marcha un operativo porque se temía que a familia da moza atacase á outra por este feito, unha actuación que explicaron os axentes no primeiro xuízo. Da mesma forma que recoñeceron que a vítima identificara aos tres acusados a través de fotos de Facebook, aínda que nos dous xuízos negou que fosen eles os autores. No xuízo deste martes tamén declarou o pai e o irmán da vítima, o primeiro dixo que culpou a esa familia “porque mo dixo a nena” e o mozo, que estaba coa moza cando foi secuestrada, asegurou novamente que non puido recoñecer a ninguén aínda que se dixo que foran dous homes e unha muller.
A fiscal chamou a declarar tamén a un dos gardas civís, que explicou o mesmo que a vez anterior, a posta en marcha do operativo ante o aviso de pelexa e a identificación dos acusados por parte da vítima. A acusación tamén rexeitou a declaración do resto de gardas civís citados, mentres que a defensa renunciou pola súa banda á declaración da psicóloga o Imelga.
