A loita dun pobo galego contra o seu illamento e o éxodo rural son temas abordados en ‘360 curvas’, documental dirixido por Alejandro Gándara e Ariadna Silva Fernández que se estreará o próximo 29 de xaneiro na Filmoteca de Galicia, na Coruña. Este martes, a película que transita entre o pasado e o presente de loita de cara a un futuro incerto na Fonsagrada, en Lugo, foi presentada nunha sesión pechada aos medios, antes de que Gándara contestase ás preguntas dos xornalistas. “É un sacrificio ir vivir alí porque non hai servizos e cada vez hai menos”, subliñou o director.
En concreto, a produción –que se estreará ás 20.30 horas na Filmoteca– combina elementos audiovisuais e fotos de arquivo con declaracións dos veciños sobre o seu illamento e a demanda dunha conexión con Lugo, unha demanda que segundo Gándara segue sendo unha petición dos veciños. “Orixinalmente, a ‘peli’ ía empezar cunha muller contando como deu a luz nunha desas curvas”, explicou o director, un episodio que exemplificaría o nivel de illamento do pobo, pero que, segundo el, alongábase “máis de cinco minutos”.
En cambio, o equipo do documental elixiu sinalar as curvas que ao longo dos anos foron bautizadas con nomes de veciños, sexa porque morreron durante o traxecto ou, entón, naceron durante o percorrido entre Lugo e A Fonsagrada, un camiño que Gándara indica contar actualmente cunhas “200 curvas”. “Agora a ‘peli’ empeza moito máis a canón e pareceunos que debería ser así. Decidimos rescatar o tema (das curvas) dun modo máis simbólico, póndolle nomes ás curvas”, detallou Ademais da Coruña, ‘360 curvas’ tamén se proxectará o día 31 en Numax (Santiago) ás 18.45 horas e nos Códex (Lugo) o domingo día 1, cun horario aínda pendente de confirmar.
“O MESMO FUTURO PARA TODO O RURAL”
Preguntado sobre que imaxinaría para o futuro da Fonsagrada, Gándara incidiu en que cre que “será o mesmo que para todo o rural se as cousas non cambian”. Neste sentido, recalcou que a aprobación do acordo de libre comercio entre a Unión Europea e o Mercosur “evidentemente significa que os pequenos produtores terano moito máis complicado competir”. “Isto foi o mesmo que co tema da industria en Europa e agora é moi difícil reverter este procedemento, tería que ser unha cousa acordada a nivel mundial”, opinou. Así, matizou que “están ben” as iniciativas para impulsar o turismo rural, así como o Camiño de Santiago, pero recalcou que o campo “debe ser campo”. “E se o campo non produce, non poderá vivir xente”, finalizou.
