A Audiencia Provincial acolleu este martes o xuízo contra un home de 34 anos, acusado de dous delitos de agresión sexual a un menor de 16 anos, co que contactou a través dunha rede social e co que mantivo relacións en dúas ocasións. A Fiscalía solicita unha pena de dez anos de prisión por cada un dos delitos. Durante a vista oral, o acusado negou os feitos que se lle imputan e a defensa pediu a súa absolución.

Segundo expuxo o Ministerio Fiscal, os feitos producíronse entre xaneiro e febreiro de 2022, despois de que o acusado contactase coa vítima a través de Tinder. O mozo, que naquel momento tiña 15 anos, acudiu ao domicilio do acusado, co que mantivo unha relación sexual completa, e tempo máis tarde, volveron quedar a través da mesma rede para un novo encontro. No seu escrito de acusación, a Fiscalía sostén que concorren dous delitos de agresión sexual e reclama, ademais das penas de prisión, unha serie de medidas accesorias de protección á vítima.

En concreto, solicita a prohibición de que o acusado se achegue ou se comunique coa vítima por calquera medio durante un período de quince anos, así como a imposición dunha medida de liberdade vixiada durante oito anos unha vez cumprida a condena. Tamén pide a privación da patria potestade ou, de forma alternativa, a inhabilitación especial para o exercicio de dereitos de patria potestade, tutela, curatela, garda ou acollemento durante catro anos, ademais da inhabilitación para calquera profesión ou oficio que leve contacto regular e directo con menores durante vinte e cinco anos.

A Fiscalía expón igualmente a substitución da pena de prisión pola expulsión do territorio nacional por un período de dez anos, atendendo á duración das penas solicitadas e ás circunstancias concorrentes no caso. Así mesmo, reclama que o procesado indemnice á vítima con 20.000 euros en concepto de responsabilidade civil. Pola súa banda, a defensa do acusado mantivo durante a sesión que non existen probas suficientes para sustentar a acusación e solicitou a absolución, insistindo na negación dos feitos. O xuízo atrasouse media hora polo atraso da vítima, que declarou posteriormente a porta pechada e tras un biombo.