O Goberno galego analizou este luns o acordo polo que se declara proxecto industrial estratéxico (PIE) o plan dunha ampliación de explotación de larva de mosca soldado negra promovido por Alternative Fats and Proteins of Galicia (Alfaprogal) en Palas de Rei. Son instalacións destinadas á cría, engorda e transformación de larvas de mosca soldado negra e ao posterior proceso industrial necesario para a obtención de produtos destinados os diferentes usos en agricultura e alimentación animal.
O proxecto de ampliación suporá un investimento de 100,3 millóns de euros e a creación de 100 postos de traballo directos e 25 indirectos. O proxecto promovido por Alfaprogal S.L. ten por obxectivo aumentar a capacidade de produción de larva de mosca soldado negra das 12.000 toneladas anuais até as 62.000.
Deste xeito, as novas instalacións contarán cunha área de cría e engorda constituída por módulos automatizados de biofiltros, control de humidade, temperatura e iluminación, con sistemas de alimentación intelixentes e recirculación de substratos; e unha zona de procesamiento industrial que incluirá liñas de renderizado, secado e separación de fases (sólida/líquida), con capacidade para producir fariñas desgrasadas e aceites industriais. Así mesmo, disporá dunha área de almacenamento e distribución onde se situarán os silos e depósitos para produtos finais, cámaras de estabilización, salas de ensacado e carga.
Os TRABALLOS EMPEZARÁN A MEDIADOS DO PRÓXIMO ANO
O proxecto tamén inclúe a posta en marcha de varias infraestruturas ambientais que inclúen un sistema de captación de emisións, recuperación enerxética e tratamento de efluentes, entre outras cuestións. A previsión é que os traballos poidan comezar a mediados do próximo ano.
