O xerente dunha empresa vinculada á construción de Lugo aceptou este xoves unha pena de 6 meses de prisión como responsable dun delito de lesións contra a seguridade dos traballadores e doutro de imprudencia grave.
Os feitos, que non chegaron a ser xulgados, xa que houbo acordo entre as partes, tiveron lugar en 2020, durante a construción do novo colexio do Sagrado Corazón.
Un dos traballadores recibiu o encargo de realizar unha tarefa “que non se correspondía coa súa cualificación profesional e na que non se aplicaron as medidas de seguridade necesarias”, segundo detalla a acusación. Por iso, unha máquina lle atrapou unha man e lle amputou parte da falanxe dun dedo da man dereita.
Aínda que nun principio por estes feitos pedíaselle ao acusado unha pena de dous anos e tres meses de prisión, acordouse rebaixar a mesma a 6 meses debido á dilación indebida do caso, do que hai cinco anos, e á intención de pagar a indemnización por parte do acusado.
Tamén foi condenado a unha multa de 1.260 euros e á inhabilitación profesional polo mesmo período de tempo. Por outra banda, a vítima recibirá unha indemnización de 9.000 euros, polas súas secuelas e lesións, que será abonada pola aseguradora.
Acordaron ademais a suspensión da condena a condición de que non volva delinquir no prazo de dous anos e pagar a multa fraccionada durante seis meses.
