A Policía Local de Lugo detivo por violencia de xénero a un home no seu domicilio, no que se estaba producindo unha forte discusión entre a parella. En base á información trasladada polos veciños, estes temían pola integrade da muller, xa que o home ameazáraa de morte.
Segundo informou a Policía a través dunha nota de prensa, efectivos desprazáronse ata o edificio en cuestión durante a madrugada deste venres. Ao chegar, a patrulla escoitou de inmediato berros e como alguén rompía mobles no interior.
Tras negarse a abrir a porta nun primeiro momento, o home recibiu aos axentes e estes accederon ao interior do inmoble. Xa dentro, falaron coa muller, a cal se negou a informar do ocorrido aos policías, que observaron desfeitos froito da pelexa.
Entón, os axentes solicitaron información aos veciños, que manifestaron que o home ameazara de morte á muller e que as discusións e pelexas eran habituais. En consecuencia, a Policía procedeu á detención do home e foi trasladado a dependencias policiais, na que se instruíron dilixencias para o xulgado correspondente.
