Axentes da Policía Local de Lugo detiveron a un condutor de 52 anos de idade que fuxiu dun control policial, circulando de forma temeraria polas rúas da cidade, e que carece de carné. Ademais, o vehículo tampouco tiña a ITV e o home deu positivo en alcol e drogas.

Segundo informaron fontes policiais, os feitos ocorreron na madrugada do pasado domingo, cando unha dotación do 092 detectou un turismo que se incorporaba á circulación desde unha zona de estacionamento da rúa Mariña Española sen sinalizar a manobra.

Tras comprobar que o coche carecía da ITV, os axentes déronlle o alto na rúa San Roque, pero o condutor acelerou bruscamente e deuse á fuga a gran velocidade, percorrendo varias rúas de forma temeraria, pondo en risco a outros usuarios da vía e peóns.

Durante a súa fuxida, o coche realizou varias manobras perigosas, xiros bruscos, derrapes e outros movementos perigosos, chegando a rebentar unha roda ao chocar contra un bolardo. Nun dos intentos de interceptación, na rúa San Roque, dous axentes tiveron que apartarse bruscamente para evitar ser arroiados, cando o condutor remontou a beirarrúa en dirección a eles, danando un sinal vertical.

A persecución finalizou cando o vehículo accedeu á N-640 en dirección saída da cidade e, ao facer un xiro brusco e meterse por un camiño de terra, precipitouse por un noiro. O condutor, un home de 52 anos de idade, foi sometido ás probas de alcoholemia, que arroxaron un resultado positivo de 0,56 e 0,53 mg/l, e tamén deu positivo no test de drogas para anfetaminas. Ao seu lado viaxaba unha muller, que tamén foi valorada polos servizos sanitarios tras o accidente.

O condutor foi detido por varios delitos contra a seguridade viaria, desobediencia e atentado contra axentes da autoridade. Ademais, durante a intervención, un dos vehículos policiais resultou danado e dous axentes sufriron lesións.