Axentes da Policía Nacional de Lugo detiveron a un home como autor dun delito de estafa e usurpación de identidade tras usar os datos dunha terceira persoa, obtidos dunha plataforma en liña, para conseguir financiamento para compáraa dun vehículo.

Segundo informou o corpo policial, en novembro de 2024 xa detiveron a dúas persoas por utilizar a documentación dunha terceira para xerar financiamento para a adquisición dun vehículo.

En abril deste ano volvéronse a reproducir os mesmos feitos. Unha persoa, suplantando a identidade e facéndose pasar polo comprador –todo iso mediante contactos telemáticos– presentou documentación usurpada e logrou facerse coa titularidade dun vehículo, do cal obtivo previamente financiamento dunha empresa de crédito para a súa adquisición.

A suposta compradora do vehículo, residente en Madrid, introduciu os seus datos persoais nun portal inmobiliario en liña, para o aluguer dunha vivenda que anunciaban.

A vítima tivo coñecemento dos feitos tras ser contactada polo concesionario da cidade, para informala da operación de compra-venda do vehículo e de que o coche xa fose entregado ao intermediario autorizado.

Ante isto, a persoa manifestou ao concesionario que nunca contactou con eles e que non solicitou nin autorizou a compra dun vehículo en Lugo. Así, tras a investigación os axentes detiveron ao presunto intermediario.

A Policía Nacional detalla que a investigación continúa aberta e non descartan máis detencións.