O Ministerio de Transportes e Mobilidade Sustentable iniciará no mes de maio a renovación completa do tramo da estrada N-540 entre Chantada e Lugo. Así o anunciou esta mañá de xoves a subdelegada do Goberno na provincia, Isabel Rodríguez, durante unha visita técnica realizada ao momento quilométrico 57 desta vía, no termo municipal de Chantada.
Rodríguez estivo acompañada por Iago Fonteboa, enxeñeiro técnico de Obras Públicas do MITMS en Lugo; Begoña Abeledo, xefa de obra da empresa contratista Taboada e Ramos; e Óscar Catoira, da asistencia técnica de control e vixilancia, ademais do alcalde de Taboada, Roi Rigueira, e distintos representantes públicos dos concellos da comarca.
A obra prevista contempla a rehabilitación integral do firme entre os quilómetros 0,000 e 68,900 ao seu paso pola provincia de Lugo, cun orzamento de 11 millóns de euros. Inclúe a renovación estrutural e superficial do firme, así como actuacións complementarias destinadas a manter os niveis de servizo da infraestrutura.
A subdelegada destacou que a intervención supón un salto cualitativo na seguridade viaria: “Non se trata só de renovar o asfalto, senón de adaptar a estrada ás necesidades actuais, protexendo aos colectivos máis vulnerables, como ciclistas e motoristas”.
O proxecto previsto para a N-540 contempla o fresado do firme existente, recrecido con capas sucesivas e aplicacións de adherencia. Nas zonas máis deterioradas executarase a demolición completa do paquete de firmes e a escavación dun metro de profundidade para repor as capas desde a base.
Tamén se regularizarán as beiravías e mellorarase a sinalización horizontal e vertical. A actuación prevé así mesmo, a reposición de elementos técnicos clave, como as estacións de aforamento e as xuntas de dilatación das pontes do tramo.
Son numerosas as protestas que se fixeron, especialmente nos últimos meses, sobre o estado desta vía, que é a comunicación máis directa entre as cidades de Lugo e Ourense. Mesmo, chegaron a facerse concentracións de veciños e a cortar o tráfico durante uns minutos en sinal de protesta.
Sobre isto, Rodríguez destacou que a estrada, que foi executada en 1996, tivo varias reparacións a base de lechadas bituminosas, pero nesta ocasión, farase unha “rehabilitación estrutural en profundidade”.
“O Goberno continúa apostando pola modernización da rede viaria estatal na provincia de Lugo. Esta obra é fundamental para garantir unha mobilidade segura e eficiente, especialmente nunha estrada con tanto tránsito como esta”, asegurou a subdelegada, engadindo que “sabemos da necesidade dos usuarios da vía por acometer estas actuacións, pero insistimos no compromiso do Goberno con feitos para dar resposta e solución a este problema”.
