A Garda Civil detivo a unha muller de 20 anos de idade, veciña de Pontevedra, como presunta autora dun delito de tráfico de drogas, por tentar introducir marihuana no centro penal de Monterroso.

Segundo informaron fontes da Comandancia, a muller tentou introducir no cárcere varios envoltorios que contiñan a droga, aproveitando a visita a un interno. Na súa detención colaborou o persoal técnico de Institucións Penais, e a muller foi posta a disposición xudicial. Por outra banda, a Garda Civil tamén informou da investigación aberta a outra muller, como presunta autora dunha simulación de delito.

Trátase dunha veciña de San Miguel de Reinante, no municipio de Barreiros, de 38 anos de idade, que denunciou en dependencias oficiais dous cargos supostamente indebidos na súa conta bancaria. A investigación permitiu comprobar que eses cargos se correspondían a dúas cotas dun préstamo contratado pola investigada, e que cobrara na súa propia conta.

Supostamente, a muller pretendía que o seu banco lle devolvese os importes das cotas domiciliadas tras formular denuncia ante a Garda Civil. As dilixencias policiais xa foron remitidas ao xulgado correspondente.