O BNG cuestionou ao Goberno sobre un novo atraso na posta en funcionamento da liña ferroviaria entre Lugo, Monforte e Ourense por problemas no túnel de Oural derivados das últimas choivas, que causaron danos nas obras. Nunha pregunta parlamentaria rexistrada no Congreso, o deputado do Bloque, Néstor Rego, instou ao Ministerio de Transportes a aclarar se a liña se porá en funcionamento antes de final de ano, para cando fora prometido despois de que se movese a data inicial prevista para abril.
Rego reclama ao Goberno que clarifique se existiu un derrube da trincheira no túnel de Oural debido ás últimas choivas e se isto provocará un novo adiamento da reanudación do tráfico ferroviario na liña. Desta forma, a formación frontista apela á Adif a fixar unha “data fiable” para a reapertura da liña.
