A Garda Civil, no marco da operación Renur1, detivo a unha veciña da localidade lucense de Begonte, de 46 anos, pola súa presunta implicación nun delito de continuado de furto exercido entre os anos 2023 e 2024 nun centro de maiores da provincia lucense, onde traballaba.
Segundo explican nun comunicado, a detida aproveitaba o seu cargo, “que lle daba trato directo e próximo cos residentes para a súa actividade delituosa”, consistente na subtracción de xoias de ouro e diñeiro en efectivo que os residentes portaban ou gardaban entre as súas pertenzas.
Detallan que se valía de accións rutineiras que lle outorgaba o seu posto de traballo, tal como manicura e pedicura, para a subtracción das xoias a residentes de avanzada idade e con problemas de saúde “que lle daban supostamente certa impunidade nas súas accións”.
A operación policial, que contou coa estreita colaboración do persoal do centro de maiores, iniciouse por mor de varios feitos cometidos o pasado mes de abril. Mediante a investigación, localizan numerosas vendas de xoias en locais de compra venda de ouro e metais preciosos durante o período citado anteriormente, que pertencían na súa maioría a residentes do centro. A detida pasou a disposición do titular do Xulgado de Instrución en funcións de Garda de Lugo durante este venres.
