Uns 50 produtores e empresarios da comarca da Ulloa e arredores sumáronse este martes á lectura dun manifesto en contra do proxecto que Altri quere instalar no municipio lucense de Palas de Rei.
Entre eles, gandeiros, agricultores, apicultores ou responsables de establecementos hostaleiros, que advertiron do “perigo” que suporía esta factoría para o territorio.
Nunha rolda de prensa na área Recreativa A Peneda, en Monterroso, a gandeira en ecolóxico Ana Corredoira destacou que todos forman parte de “un ecosistema que está en perigo” ante unha “ameaza imposta” que non os contempla e que “levaría por diante” o que construíron durante moitos anos nas comarcas da zona.
Xunto a Ana Corredoira leron a manifesto Marta Álvarez, da Granxa Maruxa, e Natalia Varela, apicultora e membro da Plataforma Ulloa Viva, baixo o título ‘Somos hijxs dunha paisaxe que nos alimenta, que é o noso fogar. Somos irmáns de terra, aire e auga’.
PERIGOS
Nel explican que deben denunciar que o territorio, a biodiversidade e hábitats de “elevadísimo valor ecolóxico e paisaxístico” están “en perigo”, así como a auga.
O documento tamén sostén, entre outras cousas, que está en perigo o tecido socioeconómico da zona, “que resultou ser un modelo exitoso de fixación de poboación e de cohesión territorial”, e o sistema agrogandeiro, “cun importante peso das producións diferenciadas e garantistas cos obxectivos recolleitos nas políticas do marco europeo”.
Así mesmo, as persoas produtoras das comarcas da zona expuxeron unha mostra dos produtos que “cultivan, coidan, elaboran, transforman e comercializan desde o territorio” e que ven perigar o seu futuro “de instalarse a macrocelulosa en Palas de Rei”.
