Axentes da Garda Civil detiveron na estrada LU-612 a dous veciños de Lugo como presuntos autores dos delitos de roubo con forza en vivendas habitadas e por tenencia ilícita de armas. Así, os investigadores atribúenlles roubos en vivendas de Pallares, Portomarín e Lugo, e lograron recuperar 11.200 euros en efectivo, documentación persoal, xoias, un arma de fogo, e outros efectos subtraídos neses domicilios, así como ferramentas utilizadas para cometer estes delitos. A Garda Civil destacou que, no desenvolvemento desta operación, foi “fundamental” a colaboración cidadá. As persoas detidas foron postas a disposición do xulgado de instrución 3 de Lugo, que decretou a súa posta en liberdade en calidade de investigados.