Axentes da Policía Local de Lugo identificaron a dúas persoas por manipular os cables de subministración eléctrica dun inmoble, situados na rúa, para ‘puentear‘ o contador da vivenda.
Segundo informaron fontes policiais, os feitos ocorreron na mañá deste xoves, cando o 092 recibiu un aviso sobre os residentes dunha vivenda na rúa Escocia, que estarían a manipular os cables da rede eléctrica situada na vía pública.
Unha vez no lugar, os axentes comprobaron que a liña de subministración de enerxía ao inmoble fora manipulada, posto que o cable que une a caixa de acometida co contador fora cortado. Así, uniuse directamente esa caixa co cadro onde se sitúan os térmicos de seguridade, evitando o paso da enerxía polo contador.
Por iso, a Policía procedeu a identificar aos dous residentes da vivenda e tramitáronse as correspondentes dilixencias para remitir ao xulgado.
