A asociación Lugo Monumental dirixiuse ao Concello, á subdelegación do Goberno e ao Ministerio do Interior para reclamar que se reconsidere a decisión de non situar a nova Comisaría no centro histórico. Lugo Monumental pediu reverter a “paulatina desaparición de servizos” no centro e sinalou que a reforma do edificio coñecido como ‘de Obras Públicas’ parecía “unha boa opción” pola súa localización e pola vantaxe de dar uso a un inmoble xa existente.
Segundo advertiron, a recolocación da Policía Local na zona sur do centro urbano e a previsión de instalar a Comisaría de Policía Nacional na zona norte “descentran completamente a protección do centro histórico”.
Lugo Monumental denunciou que, nas últimas décadas, o centro histórico viuse privado de numerosos servizos, que foron trasladados a outras zonas, “en moitas ocasións con pobres resultados”. Respecto diso, referiuse ao Museo Interactivo da Historia de Lugo, que “supuxo un gran investimento que non se está rendibilizando” e que, se estivese no centro histórico “o seu uso e afluencia serían outros totalmente diferentes“, ou ao novo Auditorio.
Outros servizos que foron desprazados son servizos sanitarios ou de emprego, e Lugo Monumental advertiu de que “mesmo as comunicacións afástanse do centro histórico coa construción da intermodal”. A asociación censurou que se constrúan ou proxecten edificios para servizos públicos afastados do centro, e augura que moitas desas iniciativas converteranse nun “sonoro fracaso”.
Con respecto ao edificio ‘de Obras Públicas’, consideran “rechamante” que se xustifique non recuperar o inmoble pola posible aparición de restos arqueolóxicos, e cuestionaron, se a propia administración, que conta con recursos, “non dá exemplo pondo en valor eses restos”, “como se atreven a esixir ao particular o mesmo”.
