A Consellería de Medio Rural informou este martes da conclusión do proceso de reforma das instalacións da Base de Unidade Operativa (BUO) de Monterroso, á que se destinou un orzamento de case 69.000 euros. Os gastos foron financiados na súa totalidade a través de fondos Feder React, como resposta da Unión Europea á pandemia da covid-19.

As melloras consistiron, esencialmente, no acondicionamento de vestiarios, duchas, zonas de descanso, almacéns para material e instrumental de traballos, ademais dos recintos para gardar os vehículos.

A edificación, localizada no concello lucense de Monterroso, é o punto de encontro do persoal das brigadas forestais. Con estas melloras, preténdese favorecer a conciliación entre descanso e traballo dos bombeiros e axentes.