Axentes da Policía Local de Lugo detiveron a un home nas últimas horas como presunto autor dun delito de ameazas, tras abordar un viandante e intimidalo cun coitelo. Segundo informaron fontes policiais, os feitos ocorreron na tarde deste mércores, cando o 092 recibiu varios avisos de testemuñas que informaban dunha pelexa entre dúas persoas na vía pública, na Avenida da Coruña.
Ao chegar, os axentes observaron aos dous implicados, e que un deles abandonaba o lugar e metíase nun supermercado próximo. Ao entrevistarse coa persoa que estaba na rúa, esta explicou aos policías que ía camiñando e que un home o abordou.
Segundo a súa versión, o home, ao que non coñece de nada, propináralle unha patada nas costas e, mentres lle ensinaba un coitelo, lle advertía de que o ía a apuñalar. Os axentes localizaron ao sospeitoso e, ao cachealo, atopáronlle un coitelo cunha folla de 9 centímetros. O home foi detido e trasladado a dependencias policiais.
AGRESIÓN NUN LOCAL
Por outra banda, a Policía tamén informou doutra intervención, nun local hostaleiro da mesma Avenida da Coruña, na noite deste mércores. Ata o lugar acudiu unha dotación, alertada por unha pelexa e, alí entrevistáronse cun home que presentaba un corte nun antebrazo. Esta testemuña explicou que, momentos antes, cando estaba a ver un partido de fútbol, mantivo unha discusión con outro individuo e que este, nun momento dado, colleu un taburete e tentou golpealo, parando el a agresión co brazo.
O presunto agresor non se atopaba no establecemento, polo que os axentes tomaron declaración ás testemuñas, e xestionaron o acceso ás imaxes captadas polas cámaras de vixilancia, para as dilixencias de investigación e localización do suposto autor do ataque.
