A Piringalla, o Agro do Rolo e Lugo en xeral podemos estar ben orgullosos dos nosos artistas. En só tres anos (2021, 2022 e 2023) tres dos graffiteiros da nosa cidade acadaron premios de talle mundial na maior plataforma de arte urbano do planeta: Street Art Cities.
O primeiro deles foi Diego Anido Seijas (Diego AS) co seu Xulio César, na Ronda da Muralla, mellor mural do mundo do ano 2021. Unha obra que traspasou fronteiras e que milleiros de visitantes levan fotografado dende o Arde Lucus (a obra foi realizada durante esta festa de recreación histórica) do citado ano.
O segundo foi Rubén Paz (proxecto Trece Trazos) co seu “Don Quijote” no CEIP Cervantes onde el mesmo estudou sendo un neno. Esta obra foi recoñecida como o segundo mellor mural do mundo do mes de agosto do ano 2022.
O terceiro foi Yoe33 o pasado mes de xullo, coa súa obra “Copora”, unha castrexa, galaica, que conmemorou a pasada edición do Arde Lucus como no caso de Diego. De momento mellor mural do mundo do mes de xullo, pero pode que pronto sexa algo máis.
Chegará o seguinte recoñecemento nas votacións a mellor mural do mundo do 2023 nas que Yoe33 (Manuel Pallín) é un dos aspirantes ao galardón mundial? Saberémolo a partir do 31 de xaneiro, cando rematan as votacións.
