Axentes da Policía Local de Lugo localizaron a un home, que camiñaba desorientado por unha beiravía nas proximidades do Hospital Lucus Augusti (HULA), e que se ausentou do centro sanitario.
Segundo informaron fontes deste servizo, os feitos ocorreron sobre as 12,45 horas do pasado luns, cando a sala dle 092 recibiu un aviso sobre a presenza dun home, aparentemente desorientado, camiñado pola beiravía dunha das vías adxacentes ao hospital.
Unha unidade trasladouse á zona, e localizou ao home na Estrada da Fonsagrada. Os axentes comprobaron que o home presentaba a mirada perdida e que non respondía os requirimentos, polo que se iniciaron as pescudas oportunas para aclarar a súa situación.
Así, a Policía puido comprobar que o home se ausentou do HULA, onde se atopaba pendente de ser sometido a probas médicas. Os axentes trasladárono de novo ao hospital, onde quedou baixo o coidado da súa familia.
SEGURIDADE VIARIA
Por outra banda, a Policía Local de Lugo tramitou varias denuncias nas últimas horas por delitos e infraccións relacionadas coa seguridade viaria. Así, dous condutores foron denunciados por circular coa ITV sen pasar no prazo establecido, e outro máis por facelo sen o seguro obrigatorio.
