O presidente da Deputación de Lugo, José Tomé Roca, asinou no Pazo de San Marcos un acordo de colaboración co Alcalde da Fonsagrada, Carlos López López, para ampliar e renovar o parque móbil municipal e mellorar o servizo de augas fonsagradino, cunha axuda de 120.000 euros.
En concreto, a entidad local comprará con esta dotación un camión con gravilladora, unha apisoadora autopropulsada, unha rozadora forestal de brazo para axustar ao tractor, unha pick-up, unha placa compactadora usada, un grupo electrógeno usado para soldadura, seis depósitos de auga para uso alimentario e un caudalímetro electromagnético.
Con este investimento, subliñou o presidente, “estamos a demostrar de novo que a cooperación cos concellos é a función esencial desta institución e que, sen ela, moitos municipios non poderían prestar os servizos que precisan aos seus veciños”.
O presidente provincial engadiu que, nun concello de Montaña como este, “é fundamental contar con maquinaria idónea para o mantemento de estradas, dos camiños e do conxunto dos servizos básicos necesarios para os veciños”.
