A conselleira de Política Social e Xuventude, Fabiola García, confirmou que “en próximas semanas” a Xunta sacará a licitación a xestión das residencias que a Fundación Amancio Ortega construíu en Santiago de Compostela e en Lugo, coa intención de que no primeiro trimestre de 2024 estean xa en funcionamento.
Non serán centros de xestión directa autonómica, pero a conselleira detallou este sábado, en declaracións aos medios, que serán “entidades sociais sen ánimo de lucro” as que se farán cargo do seu funcionamento. García aproveitou para dar “as grazas” á Fundación Amancio Ortega pola construción destas residencias nas sete cidades galegas.
A do barrio do Castiñeiriño, en Santiago, que o pasado 24 de outubro foi entregada á Xunta nun acto público, contará con 120 prazas de financiamento público, igual que a de Lugo. Segundo a conselleira, estas residencias serán “das mellores en Europa” e a previsión é que serán de xestión por parte de entidades sen ánimo de lucro.
