Unha persoa faleceu no municipio lucense de Pol tras saírse da estrada co vehículo que conducía e chocar contra unha árbore.
Segundo informou o 112, á súa chegada, os profesionais sanitarios confirmaron o falecemento dunha das dúas persoas que viaxaban no vehículo, e cuxo corpo tivo que ser liberado polos Bombeiros. Foi un particular quen, minutos despois das 18 horas, contactou co 112 para informar o accidente, que se produciu no quilómetro 2 da LU-760, na parroquia de Fraialde.
Desde o Centro Integrado de Atención ás Emerxencias solicitouse a colaboración de Urxencias Sanitarias de Galicia-061, dos Bombeiros de Vilalba, da Garda Civil de Tráfico e dos membros da Agrupación de Voluntarios de Protección Civil de Pol. Á súa vez, o outro ocupante do vehículo foi evacuado en ambulancia ao centro hospitalario de referencia.
