Axentes da Policía Local de Lugo identificaron o pai dun menor que se negou a pagar varios obxectos que o seu fillo tirara do andel dun establecemento en Lugo.
Na tarde do pasado sábado, unha patrulla da Unidade Territorial de Policía Local foi comisionada pola Sala do 092 para acudir a un establecemento de alimentación na Avenida das Fontiñas, xa que unha persoa estaba a causar molestias no interior.
Os axentes foron informados polo persoal do local de que un neno, que se atopaba co seu pai, tirara obxectos dos andeis sen ser reprendido polo seu proxenitor. Entre outras cousas, sinala a Policía, o menor colleu unha pistola de auga e rompeuna.
Os traballadores do establecemento solicitaron ao pai que abonase os danos e el negouse.
Así, os policías identificaron o pai do menor, recoñecendo que o seu fillo collera diversos artigos e tirounos ao chan e asegurando que non ía pagar nada. A continuación, os policías levantaron acta de intervención á espera da presentación da correspondente denuncia polo responsable do establecemento.
