Axentes da Policía Nacional da comisaría de Lugo detiveron a sete novos da cidade por unha pelexa multitudinaria que se produciu nas primeiras horas do 1 de xaneiro.
Segundo informa o corpo policial nunha nota de prensa, os feitos foron denunciados o 1 de xaneiro, despois de producirse unha pelexa na saída dun local de lecer, cando os detidos supostamente agrediron ás vítimas.
Entre os denunciantes, constatáronse lesións leves de diversa consideración, pero tamén houbo un ferido máis grave, coa mandíbula fracturada.
Tras a investigación, concluíuse que, despois do peche do local, “os agora detidos buscaron o enfrontamento cun dos grupos de persoas que saían do interior do local, tras finalizar a festa de fin de ano”.
Despois, segundo o relato policial, “agredíronos e provocaron a perda de coñecemento dun deles, á vez que a un fracturóuselle a mandíbula”. Como consecuencia da agresión, o mozo tivo que ser tratado de urxencia no Hospital Universitario Lucus Augusti (HULA).
