O sindicato Comisións Obreiras (CC.OO) informou este martes da recepción dun escrito asinado polo servizo de Inspección de Familia e Menores da Xunta de Galicia que certifica o “abandono” denunciado hai un mes por este sindicato da escola infantil luguesa Gregorio Sanz.
O documento en cuestión informa dunha visita de Inspección ao centro a comezos deste mes de decembro que “constata deficiencias que requiren ser emendadas nun breve prazo”.
Desde CC.OO consideran “inaudito” que a Xunta de Galicia, desde Santiago de Compostela, “actúe e se mova con maior rapidez que o Concello de Lugo”.
O secretario xeral comarcal de CC.OO, Manuel Quiñoá, lamentou que, pasados varios meses, o goberno local “nin sequera respondese os escritos enviados”.
Tal e como sinalou CC.OO, o sindicato denunciou hai un mes, tanto na Consellería de Política Social da Xunta como en Inspección de traballo, a situación “insustentable” desta escola infantil que “vén de lonxe”, concretamente desde o ano 2016.
Tras recibir o requirimento da Xunta, CC.OO espera que o Concello de Lugo “asuma dunha vez as súas responsabilidades, tanto cos menores que acoden ao centro como cos traballadores”.
