Un veciño de Lugo aceptou dous anos de prisión tras recoñecer a agresión sexual a unha muller en novembro de 2019. Este acordo de conformidade trasladouse este mércores á Sección Segunda da Audiencia Provincial de Lugo, onde se ía a celebrar o xuízo polo que nun principio a fiscalía pedía cinco anos de prisión.
Segundo o relato fiscal, os feitos ocorreron o 11 de novembro de 2019. Esa noite a vítima, xunto cunha amiga, estivo en varios locais de lecer da cidade. Sobre as 3,30 da madrugada, saíron do local e sentaron nun portal, onde se toparon co procesado en compañía de varios amigos.
A partir de aí, o acusado e a vítima desprazáronse ata a Praza Maior e, posteriormente nun portal da Praza Campo Castelo, “sen que conste o emprego de violencia ou intimidación e sen mediar consentimento dela, dado que tiña moi diminuída a súa capacidade volitiva e intelectiva, debido ao seu estado de intoxicación etílica”, o home “aproveitándose da súa situación”, mantivo unha relación sexual coa vítima.
O avogado do procesado, Javier Latorre, concretou que aceptando estes dous anos o seu cliente “evita a entrada en prisión”, pero critica que pasou uns meses en prisión provisional. Considera o acordo de conformidade un “arranxo xusto para ambas as partes”. O acordo estima unha responsabilidade civil para a vítima de 6.000 euros.
