O BNG en Pol volve a exgigir ao alcalde do municipio, o socialista Liño Rodríguez, unha desculpa pública despois da súa condena por agredir a un mozo afeccionado durante un partido de fútbol o pasado 8 de maio.
A pena, tras achalo culpable dun delito de lesións leves, é dunha multa de 540 euros e unha indemnización para o mozo de 120 euros. Os feitos ocorreron durante o encontro entre o Pol e o Portomarín, onde ambos os equipos se xogaban o ascenso a Rexional Preferente.
Tras o fallo do Xulgado de Instrución Número 2 de Lugo, emitido case seis meses despois do ocorrido, os nacionalistas lamentan que “aínda non se emitiu ningunha explicación, nin depuración de responsabilidades, nin unha condena ante os feitos”.
Así, o Bloque segue condenando este “comportamento impropio” e denuncia a “degradación pública”, así como a “deterioración da política e da ética” no municipio de Pol. Precisamente, o BNG lembra polémicas previas do alcalde como a denuncia –que foi arquivada– por suposto acoso laboral pola exsecretaria do Concello e outra proposta de sanción por incumprir co confinamento de primavera do 2020.
