A xunta de goberno da Deputación de Lugo aprobou adxudicar equipamento para a residencia de Ribas de Sil por máis de 170.000 euros.
En concreto, trátase de dous dos cinco lotes do contrato para a subministración de material ao centro, correspondentes a mobiliario xeral e cortinas, mentres que a dotación restante –equipos médicos, lavandaría e cociña, entre outras– adxudicaranse en próximas semanas.
“Seguimos dando os pasos necesarios, en tempo e forma, para poder cumprir co compromiso de abrir esta residencia neste ano 2022″, explicou o deputado de Promoción Económica e Social, Pablo Rivera.
O investimento total de equipos no centro de Ribas de Sil ascenderá a 332.00 euros. De tal forma, ao final do mandato, a Deputación de Lugo contará con nove centros públicos de maiores en funcionamento.
