A senadora lucense do PP, Rosa Arza, expuxo unha serie de preguntas para que o Goberno central explique por que Renfe non contempla a opción de activar reforzos a pesar da gran demanda de servizos ferroviarios, recortados no caso galego durante a pandemia.
“Dous anos despois da pandemia é imposible saír de Galicia en tren, pois as prazas dos trens están completas durante o mes de agosto. Non é posible viaxar desde Santiago a Barcelona ata o día 5 de setembro e tampouco hai opcións viables en chegar ao País Vasco pois a liña suprimiuse”, explican os populares.
Segundo dixo Arza, na propia provincia de Lugo “resulta imposible adquirir un billete para viaxar de Lugo a Barcelona durante o mes de agosto”, unha situación á que non se puxo solución nin “coas cifras récord de peregrinos” deste ano nin co incremento de demanda pola alza dos prezos do combustible.
Con iso, a senadora pregúntase “como é posible que non se resolva esta situación que está a afectar a Galicia, e tamén como é posible que o Goberno non tome medidas ao respecto, mostrando, unha vez máis pola súa banda, abandono en materia ferroviaria”.
