Un home de 40 anos foi detido tras agredir á súa esposa ás 23,35 horas deste luns na avenida das Américas, en Lugo. Segundo o informe policial, o autor discutía coa súa muller e, a continuación, agarrou “fortemente” á súa esposa e empurrouna contra a parede para, despois, abandonar o lugar.
O feito foi denunciado por varios veciños da zona e dúas mulleres informaron aos corpos policiais da situación. Os axentes entrevistaron a muller agredida, que se atopaba “chorando e moi nerviosa”.
A vítima manifestou que, momentos antes do feito, discutira co seu marido posto que quería regresar ao seu domicilio, pero este impedíallo. A muller, como mencionaran os veciños, indicou que o seu esposo a agrediu ata que acudiron varias persoas ao lugar
Posteriormente, os axentes localizaron o presunto autor dos feitos. Tras recoñecer que era a súa muller e argumentar que “só discutían”, os corpos policiais arrestárono e trasladaron a dependencias policiais, onde se instrúen dilixencias para o Xulgado correspondente.
DOBRE SANCIÓN
Por outra banda, un home recibiu dúas sancións por alegar datos inexactos da súa identidade e por falta de respecto e consideración aos axentes de policía este luns –16,15 horas– na Avenida da Coruña, en Lugo.
O autor de ambas as infraccións á Lei de Seguridade Cidadá atopábase, segundo indica o Concello de Lugo, en “estado de embriaguez” e tentaba pór en marcha unha motocicleta.
O individuo, cando os axentes procedían á súa identificación, manifestou que non portaba ningún documento e indicou uns datos do seu DNI “inexactos”. Ademais, encarouse e faltou o respecto dos policías presentes.
Ante iso, os gardas trasladaron o home a dependencias policiais para realizar as oportunas dilixencias de identificación e espérase a denuncia da propietaria da motocicleta.
