O presidente da asociación de empresarios do transporte Asociación Empresarial Transportes Río Miño (Aetram) en Lugo, Diego Arias, asegura que, co prezo do carburante disparado, “agora mesmo é inviable traballar”.
“A día de hoxe sáenos a conta mellor ter os camións parados que andando”, sentenza. “Antirrendible total”, agrega este empresario do sector do transporte.
En canto aos 20 céntimos de axuda do Goberno central ao litro de combustible, Arias lamenta que ese “desconto xa o comeu na primeira semana”, polo que considera que apenas serviu para frear a escalada de prezos. “Seguimos esperando a ver se desde a administración hai algunha solución, porque se non, imos vernos obrigados a parar, e sen tardar moito”, advertiu Arias.
Ademais, quéixase de que Galicia sexa unha das comunidades co carburante “máis caro” nas gasolineiras, e iso a pesar de contar “con refinaría na Coruña”. “É unha das preguntas que sempre nos facemos, na Coruña temos unha refinaría e resulta que esta refinaría fornece a Castela-León e resulta que é máis barato o carburante nesa comunidade que en Galicia”, reproba o presidente de Aetram en Lugo.
Actualmente, os prezos do gasoil en varias estacións de servizo da cidade de Lugo superan xa os dous euros.
