Tal e como autorizou esta semana a Xunta de Goberno, a alcaldesa de Lugo, Lara Méndez, asinará un convenio que ampare a aplicación de rebaixas fiscais ao Sergas para que reforme o Centro de Saúde da Milagrosa, unha intervención que “resulta tan necesaria como demandada pola cidadanía” e o persoal sanitario.
Méndez cualificou a relación de cooperación entre os dous organismos como “un exemplo máis do entendemento tan necesario entre dúas administracións que priorizan os puntos converxentes na procura do ben común”.
Entre os obxectivos deste acordo, dixo, figura o de “darlle resposta aos problemas de saúde da poboación mediante actuacións que permitan mellorar as dotacións e as infraestruturas dedicadas á atención asistencial, o que fai necesario acondicionar as instalacións da Milagrosa”, engadiu.
O documento, que se validará este mércores, recolle como deberes da institución local o regulamento, nas Ordenanzas correspondentes, da exención á Xunta do pago do Imposto de Bens Inmobles a favor dos centros sanitarios e dunha bonificación do 95% do Imposto sobre Construcións, Instalacións e Obras que sexan declaradas de especial interese ou utilidade municipal por concorrer circunstancias sociais, culturais, histórico-artísticas ou de fomento do emprego que o xustifiquen.
Mentres, o Sergas comprométese, pola súa banda, á supervisión e aprobación do proxecto técnico, así como a contratar, dirixir e executar a reforma do Centro de Saúde con cargo aos seus orzamentos.
