O Tenente Alcalde, Rubén Arroxo, e a concelleira de Participación e Servizos para a Veciñanza, Cristina López recibiron esta mañá ao Decano da Facultade de Humanidades da USC, Gonzalo Francisco Fernández Suárez, con quen o Goberno de Lugo asinou un convenio de colaboración para recuperar documentación inédita do Cemiterio Municipal.
A concelleira responsábel do Cemiterio, Cristina López, explicou que “esta colaboración permitiranos recuperar e poñer en valor nova documentación antiga, atopada recentemente nas instalacións do Cemiterio Municipal, mentres que as e os estudantes de Humanidades terán unha gran oportunidade para realizar prácticas de tratamento arquivístico con documentación real”, explicou Cristina López.
A documentación procede dunha serie de caixas atopadas na sacristía da Capela do Cemiterio, e na revisión preliminar da mesma atopáronse licenzas ou autorizacións de enterramentos, traslados de restos e permisos de obras.
“As e os estudantes da USC poderán realizar todo o proceso de tratamento arquivístico desta documentación, pasando pola limpeza e a clasificación, ata a catalogación e dixitalización da mesma”, declarou a concelleira de Participación.
Con esta acción o Goberno de Lugo recuperará documentación xerada entre os anos 40 e 80 do século pasado. Cristina López destacou a importancia desta colaboración, “dado que son documentos únicos que polas datas coinciden coa posta en marcha do actual Cemiterio Municipal de San Froilán”.
