As familias do dobre crime do Cash Record lamentan a “paralización” da causa pola Audiencia Provincial de Lugo, que é a que ten a última palabra sobre se abre xuízo oral ou non contra o principal sospeitoso, un hostaleiro que reside agora en Burgos. A irmá dunha das vítimas, Isabel López, queixouse, despois das numerosas trabas que viviu esta instrución nos case 28 anos desde que se tirotease ao repoñedor Estebán Carballedo e á caixeira Elena López, de que o proceso “está paralizado outra vez e non se sabe por que”.
Seguidamente, puntualizou que as familias están “a esperar resposta da Audiencia”. “O último que se soubo é que ían reunir ás partes, aos avogados, e en principio non ían tardar moito”. “Non sabemos cando van reunir aos avogados e despois se toman a decisión de celebrar xuízo. Eu creo que a Audiencia ten que decidir que facer: ou xuízo ou non”, subliñou. No entanto, Isabel López non perde a esperanza e quere “pensar que se están a tardar tanto, é porque están a mover as cousas moi ben”.
SOSPEITOSO
Desde o primeiro momento, as sospeitas das familias recaeron no único investigado, un hostaleiro que rexentaba un bar na zona vella de Lugo en 1994 e que agora reside en Burgos. O próximo mes de abril fará 28 anos deste dobre crime que se atopa sen resolver, cando a propia Isabel López atopouse cos dous cadáveres nesta nave empresarial no polígono industrial do Ceao.
A irmá de Elena aproveitou para anunciar que volverán mobilizarse, con motivo do aniversario do suceso, aínda que isto dependerá de se finalmente se chega a xuízo ou non. Os familiares prevén concentrarse ás portas da Audiencia Provincial de Lugo, onde van reclamar que se faga “xustiza” con Elena López e Esteban Carballedo
