A Policía Local de Lugo denunciou ao cliente dun bar da cidade de Lugo por agredir a outro que mediou ao golpear o primeiro a man dunha camareira que lle chamou a atención por gritar.
Segundo informou a Policía Local, sobre as 17,40 horas deste pasado 12 de xaneiro unha patrulla da Unidade Territorial de Policía de Barrio foi enviada a un local de hostalaría da rúa Ramiro Rueda porque se producía unha pelexa.
Ao chegar ao lugar os axentes foron informados pola camareira do establecemento de que instantes antes un cliente se puxera a gritar, relatan as mesmas fontes, e chamoulle a atención, ante o que este lle golpeou na man.
Tras iso, outro cliente intercedeu pola camareira e o presunto agresor comezou a propinarlle golpes. Mentres, un terceiro cliente ao ver a agresión reduciu ao agresor ata que chegaron os axentes.
Entón procedeuse á identificación de todos os participantes na pelexa e o agresor foi levado a dependencias policiais, para a instrución de dilixencias para o xulgado de garda.
Pola súa banda, o cliente agredido foi trasladado a un centro sanitario para ser asistido das posibles lesións, puntualizou a Policía Local.
